الطريقة المثالية لتثبيت الوزن وتجنّب مشكلات زيادة الوزن بعد الريجيم

الطريقة المثالية لتثبيت الوزن وتجنّب مشكلات زيادة الوزن بعد الريجيم

يعني إيه تثبيت الوزن؟
تثبيت الوزن هو أن تحصل على سعرات توازي المجهود المبذول يوميا، وأن تراقب ما تأكله بعد التوقّف عن الريجيم، مع مراقبة الوزن كل فترة، والمفروض إن الشخص يكون اتعوّد على طريقة الأكل الصحيحة أثناء فترة الريجيم.

وبالتالي فتثبيت الوزن يعتبر أهم مرحلة في التخسيس، ولو عندي مريض وعندي اختيارين بين التثبيت واستكمال الريجيم؛ فأنا بافضّل إننا نبدأ بالتثبيت؛ لأني لازم أعلّم المريض الأول إزاي يحافظ على وزنه؛ وده معناه إن علاج السمنة بينقسم لمرحلتين هما الرجيم ثم التثبيت.

ومرحلة التثبيت بتيجي في الوقت اللي بيكون المريض فيه راضي عن وزنه، أو لمّا يشعر إنه تعب أو زهق من الريجيم؛ ففي الحالة دي ممكن أوقّف الريجيم، ونبدأ تثبيت الوزن، وبعدين نرجع نكمّل تاني باقي الريجيم.

إزاي الشخص يعمل لنفسه نظام علشان يثبّت وزنه؟
فيه أكتر مِن شكل للتثبيت إما بتقليل كميات الأكل؛ بمعنى إن الشخص ياكل كل حاجة لكن بكميات أقل مع ممارسة التمارين الرياضية اليومية المتاحة؛ زي المشي، أو طلوع السلم، أو ركوب العجل، أو الجيم، أو السباحة.

الطريقة التانية إن الشخص يوازن بين الوجبات؛ يعني لو في اليوم الشخص اللي بيعمل تثبيت أخد راحته في الأكل؛ فاليوم اللي بعده لازم يمشي على ريجيم، ولو لَخْبَط في الأكل يومين، اليومين اللي بعدهم يمشي على الريجيم.

المهم إن الشخص يوزن نفسه مرة أسبوعيا؛ علشان لو لقى وزنه زايد يقدر يلحق نفسه بسرعة ويخس الوزن اللي زاده، ولازم ناخد في الاعتبار إن التثبيت بيختلف من شخص لآخر حسب طبيعة نشاطه، وكمان حسب الحالة المزاجية؛ يعني فيه ناس بتحب تاكل لحد ما تشبع، وفي الحالة دي عند التثبيت لازم نكتّر من الأكل اللي بيخلينا نشعر بالامتلاء؛ زي: السلطة والفاكهة.

ليه أغلب الناس بتقابلها مشكلات كتيرة في فترة التثبيت.. وإيه الأخطاء اللي بيرتكبوها في المرحلة دي؟
أول وأكبر خطأ الناس بتقع فيه؛ هو إن المريض بيبقى معتمد في وقت الريجيم اعتماد كلي على الطبيب ونظام الأكل الأسبوعي اللي الطبيب بيحدده، وبالتالي لما بييجي وقت التثبيت المريض مش بيقدر يقيّم الأداء ده لوحده؛ لأن وقت التثبيت المريض بيرجع للدكتور 4 مرات في السنة فقط لمتابعة حالته.

والحل إن المريض يتعود على كده بالتدريج؛ فنبدأ التثبيت بإننا نتابعه في الأول كل أسبوع، وبعدين كل أسبوعين، وبعد كده كل شهر، لحد ما نوصل إن لمتابعة تبقى 4 مرات في السنة.

وبكده المريض بيتعود على نظام التثبيت وبيفهمه وبيعرف أخطائه علشان يقدر يعتمد على نفسه بعد كده حتى بعد ما بيتوقف عن الريجيم تماما، ويفهم إيه هي العادات الصحية السليمة ويغيّر عاداته كلها على الأساس ده.

في الريجيم بنعتمد على معدل الحرق والسعرات الحرارية.. إزاي المريض يبقى عنده المعلومات دي علشان يقدر يعتمد على نفسه؟
عادة السيدات بيحتاجوا للحصول على 1900 سعر حراري يوميا أثناء مرحلة التثبيت، أما الرجال بيحتاجوا للحصول على 2500 سعر حراري يوميا؛ وده لأن الرجل عنده نسيج عضلي أكبر، وده بيخلّيه محتاج لسعرات حرارية أكتر.

بالإضافة إلى إن المعدل اللي بيحتاج له كل فرد بيعتمد على الوظيفة والرياضة والسن؛ لأن الناس اللي سنهم صغير بيحتاجوا عدد سعرات أكبر علشان النمو، أما بعد سن 65 سنة مش بيحصل زيادة في الوزن، وبالتالي بنحتاج لعدد سعرات حرارية أقل.

وكل فرد يقدر يحسب المعدلات المناسبة له بإنه يوزن نفسه أسبوعيا مع تسجيل عدد السعرات الحرارية اللي بيحصل عليها خلال الأسبوع، ولو لاحظ إن وزنه زاد خلال الأسبوع ده يبقى هو محتاج لتقليل عدد السعرات الحرارية بعد كده، وبكده يبقى الشخص هو الرقيب على نفسه.

إيه هي أنسب التمارين الرياضية اللي ممكن الشخص يمارسها في فترة التثبيت؟
الرياضة بكل أشكالها سواء كانت ماتش كورة أو جيم أو أيروبكس أو جري مفيدة للإنسان، لكن المشي السريع لمدة 40 دقيقة أو أكتر 5 مرات في الأسبوع هيبقى مناسب جدا لكل الأشخاص وكل الأعمار.

» كيف تتخلصي من زيادة الوزن بعد الولادة
» الملل يسبب زيادة الوزن
» ما اسباب زيادة الوزن فى الشتاء؟
» النوم فى ساعة متاخرة سبب زيادة الوزن
» 5 اكاذيب عن الريجيم والتغذية